Taqomaki iko mai na ilawaki ca ni vakailesilesi lasu ni curuvanua

Kevaka o nanuma me dua na nomu ivolatara ni curuvanua mo lako mai Niusiladi, qarauni ira era rawa ni lawakitaki iko me ra butakoca na nomu ilavo se me ra via vakacurumi kemuni ena so na cakacaka ka veicalati vata kei na veika era yalataka.

Era sa koto oqori e ra eso na ikalawa mo rawa ni taqomaki iko kina mai na ilawaki ca ni curuvanua.

Kevaka o sa cakacaka tiko e Niusiladi, ka o qai nanuma ni o a lawakitaki, kakua ni rere mo kerea na veivuke ni Tabana ni Curuvanua e Niusiladi. O keitou kei na Tabana ni Veivakacakacakataki e Niusiladi e rawa ni veivuke kevaka e gadrevi.

Qarauna na ivakatakilakila ni lawaki ca

Kevaka o sa raica eso na ivakatakilakila ni lawaki ca, mo tu vakadua ka qaqarauni. Vakatataro ka kerea na ivakasala ni matanitu. E rawa ni o vosa vei keitou me baleta na veika o leqataka.

O kerei mo sauma na nomu cakacaka

Qarauna kevaka e kerei vei iko mo sauma e dua na ka me baleta na nomu cakacaka, eso na gauna e dau tukuni ni kena cakacakataki se isau ni kena vaqarai.

Era sega ni rawa ni lavaka vei iko na itaukei ni cakacaka e Niusiladi e dua na ka mo sauma me baleta na cakacaka se na kena vakasaqarai o koya me cakacaka. Oqo e okati kina e dua tale ka qai via lavaka mo saumi ira.

Kevaka o vakayagataka:

• e dua na tabana ni vaqaqara cakacaka, mo qarauna na sau levu ni veika e ra na lavaka mo sauma. Kevaka e dua na ka e lavaki mai vua e dua na tabana ni vaqaqara cakacaka, e dodonu me baleta ga na veiqaravi e ratou solia vei iko.
• e dua na dau ni vakasala ni curuvanua ena lavaka na isau dodonu me baleta na nona veiqaravi.

Na Tabana ni Curuvanua e Niusiladi e lavaka ga na isau ni kerekere. Ena gadrevi mo sauma na isau ni kumuni ni ivakadinadina ni nomu kerekere me vaka na kena vakacavari na ivola tukutuku ni vuniwai.

Na kena vakau vakatotolo kei na kena yaco vei ira na vakailesilesi ni tabana ni curuvanua

Ena lawaki ca e yaco tiko oqo, o ira na nomu dau ni vakasala, itini, nomuni mata era rawa ni tukuna ni tiko na nodra isema ka rawa ni vakadeitaka na kena tau vakatotolo na lewa.

E sega ni gadrevi mo vakayagataka e dua na daunivakasala. Na Tabana ni Curuvanua e Niusiladi:

• ena sega ni rawa ni vakatotolotaka na nomu kerekere ena vuku ni nomu vakayagataka e dua na dau ni vakasala, ka na
• vakatauca ga na lewa me baleta na kerekere ena kena dikevi na itukutuku vata kei na lawa ni curuvanua.

O kerei mo lasu

E cala vakalawa mo lasu mo rawa ni rawata kina e dua na cakacaka se na vola tara ni curuvanua.

E na basuka na lawa na nomu dau ni vakasala se dua tale kevaka e ra vakasalataki iko mo cakava. E sa ivakaraitaki ni rawa ni ra basuka tale eso na lawa ni curuvanua se veivakacakacakataki.

E sa bibi me dina na itukutuku o solia. Na itukutuku o solia ena vauca na nomu kerekere ena gauna oqo vaka ena gauna mai muri.

E tukuni vei iko ni sega ni tautauvata na nomu dodonu ni vakacakacakataki kei na dua na lewenivanua e Niusiladi

Oqo e sega ni dina. O ira kece e Niusiladi e tautauvata na nodra dodonu ni vakacakacakataki okati kina o ira e ra lako mai vanua tani. Oqo e okati kina na isau ni olodei kei na livi ni tauvimate, kei na dodonu ni kena kudruvaki na ivakarau ni cakacaka e sega kina na veitaqomaki.

O ira era kaya ni sega ni vaka kina, e sa rawa ni ra basuka tiko na lawa ni curuvanua kei na veivakacakacakataki.

Na veika e soli vei iko e okati kina na nomu itikotiko

E sega ni dau yaco wasoma me soli na cakacaka sala vata kei na itikotiko e Niusiladi.

E so ga na vanua me vaka na cakacaka ena vanua ni vakayagataki qele se na cakacaka vua na itaukei ni vale e rawa ni yaco kina.

Qaqarauni vinaka ena baca e soli vata mai na ivola tara ni cakacaka, na cakacaka kei na vale - era na rawa ni lavaka e dua na isau levu ni vale o ira na lawaki ca.

E yalataki vei iko na vale

E vakarautaki vinaka e Niusiladi na katuba ni vuli kei na cakacaka. Na ivola tara ni curu vanua e vakaiyalayala na kena gauna e dolava e vuqa na katuba, ia e sega ni rawa ni vakadeitaka ni na rawa ni soli na vale.

O ira na lawaki ca era rawa ni lavaka na isau ni vale, mo qarauna vinaka ka ni yavu e rawa kina na vale e gadrevi kina na kila vakacakacaka, balavu ni gauna o sa kila tiko mai kina, ivakatagedegede ni vuli kei na cakacaka.

Yalataki ni isau ena veigauna mai muri, voli vale se rawata na veivuke ni matanitu

E dodonu mo vakatulewa ena nomu via lako i ke ena yavu ni veika e soli vei iko, ka sega ni veika e yalataki vei iko ena vei gauna mai muri e qai sega ni rawa.

Vakararaba, e sega ni rawa ni voli na vale se rawata na veivuke vakailavo ni matanitu vakavo kevaka o sa lewenivanua tudei. E sega ni rawa mo cakava tale e dua na cakacaka mo rawata tale kina eso na ilavo.

E tukuni vei iko ni dodonu mo vakayagataka e dua na daunivakasala

E sega ni gadrevi mo vakayagataka e dua na daunivakasala mo kerea na ivola tara ni curuvanua. E rawa ni o kerea vakataki iko e dua na ivola tara ni curuvanua ena nomu vakayagataka na itukutuku era tiko ena neitou website.

Kevaka o nanuma mo vakayagataka e dua na daunivakasala, vakayagataka ga na daunivakasala e vakalaiseni me soli vakasala me baleta na curuvanua, e dua na loya vakadonui e Niusiladi, se dua tale e rawa vakalawa me solia na ivakasala ni curuvanua. E rawa ni o digitaka e dua na daunivakasala e vakalaiseni yavutaki ena nomu vosa, vanua o tiko kina kei na nomu ituvatuva vakailavo.

E sega ni soli vei iko na itukutuku ni veika e sa yaco tiko

Kevaka e sega ni solia na nomu daunivakasala se dua tale na itukutuku ni veika e sa yaco tiko, e rawa ni o raica ena neitou website na balavu ni gauna e dau cakacakataki kina na kerekere.

Kevaka o leqataka ni sega ni soli tiko vei iko na itukutuku, e rawa ni o qiriti keitou me keitou vakadeitaka na nomu kerekere.

O raica e dua na imeli se website e tukuni ni lako mai na Tabana ni Curuvanua e Niusiladi

Keitou kila e so na imeli kei na website e ra vakalecaleca ena ilawaki ni ra lako mai na Tabana ni Veiqaravi ni Curuvanua e Niusiladi. Vakayagataka na sala vakamatanitu ena veiqaravi oqori me vakadeitaka ni na sega ni lawakitaki mo raica eso na website lawakitaki. E rawa ni o vakadeitaka qori ena nomu raica na yaca ni website me vakadeitaka ni volai taucoko tiko kina na ‘immigration.govt.nz’. Vakaraica vakavinaka ni rawa ni ra rairai tautauvata na yaca ni website.

Na yaca ni website ni matanitu mai na Tabana ni Curuvanua e Niusiladi e tini e na ‘immigration.govt.nz’ se ‘mbie.govt.nz’.

E tauyavutaka na matanitu e Niusiladi e dua na website e vakatokai na nomu vakayagataka na initaneti me vukei ira na tamata me ra vulica na taqomaki ena veilawakitaki ena initaneti. E levu cake na veidusimaki e tiko kina me kilai kina na ilawaki ena initaneti.

O sa kerei mo sauma na isau ni nomu ivolatara ni curuvanua se isau ni nomu qaravi vakavuniwai e na dua na akaude ena baqe

Keitou na sega vakadua ni rawa ni kerei iko mo sauma na isau ni nomu kerekere ni ivolatara ni curuvanua ena nomu vakacuruma na ilavo ena dua na akaude ni baqe. Keitou ciqoma walega na sausaumi ena kadi ni nomu ilavo se kadi ni dinau kei na fomu ni kerekere volai ena pepa. E rawa talega ni o sauma na isau ni nomu kerekere ni ivolatara ni curuvanua ena dua na Tabana ni Kere iVolatara ni Curuvanua e vakadonui ena taudaku kei Niusiladi.

Eso na vuniwai vakadonui kei ira eso na vuniwai era rejisita ena nodra dui vanua e ra rawa ni ciqoma na isau ni veiqaravi vakavuniwai me baleta na curuvanua. Keitou na sega vakadua ni kerei iko mo sauma na isau ni nomu dikevi vakavuniwai. Na sausaumi oqo e dodonu me soli ki na vale ni veiqaravi ni vuniwai se na vuniwai e rejisita.

Veisala mo taqomaki iko kina mai na ilawaki ca

• E sega ni gadrevi mo vakayagataka e dua na daunivakasala. Kevaka o digitaka e dua na daunivakasala, mo vakayagataka na daunivakasala e vakalaiseni me solia na ivakasala me baleta na curuvanua, e dua na loya e vakadonui e Niusiladi, se dua tale e rawa vakalawa me solia ivakasala ni curuvanua.
• Kevaka o digitaka e dua na daunivakasala se tabana ni vaqaqara cakacaka, ena vinaka mo vakatauvatana na nodra isau ni veiqaravi kei na so tale me rawa ni o vakadeitaka kina ni veirauti vinaka na isau era lavaka kei na nodra veiqaravi.
• Qarauna mo raica na veiqaravi ni Tabana ni Curuvanua e Niusiladi ena initaneti. Mo dikeva vakavinaka na yaca ni website no vakadeitaka ni sa tiko kina na ‘.immigration.govt.nz’ se raica na nodratou veiqaravi ena neitou website.
• Vakadeitaka ni o koya me nomu itaukei ni cakacaka e sa vakadonui. E dodonu me ra sa vakadonui taumada o ira taucoko na itaukei ni cakacaka e ra ia vei vakacakacakataki e na ivola tara ni curuvanua ni cakacaka ena iTaukei ni Cakacaka vakadonui. Vakadeitaka ni ra sa vakayagataka tiko neitou ivakarau ni cakacaka ena initaneti.
• Mo vosa vakadodonu vua o koya e via nomu itaukei ni cakacaka me vaka na veivakatarogi ni cakacaka. E sa dua na icolacola levu na toki ki na dua tale na vanua, mo dinata na veika o kena dau kina ka vakadeitaka ni vinaka tu na ituvaki ni yagomu.
• Veitaratara mai vei keitou kevaka o vakatitiqa. Keitou rawa ni veivuke me keitou vakamacalataka na ivola tara ni curuvanua tale eso se vakadeitaka ni dina ka dodonu na itukutuku e sa tukuna oti vei iko e dua. Keitou rawa ni solia na itukutuku me baleta na nomu kerekere. E rawa ni keitou vakaraitaka vei iko e dua na dau ni vakadewa vosa kevaka e sega ni nomu vosa na vosa vaka Vavalagi.
• Kevaka e rawa, vakatarogi ira mai na nomu vanua era sa lakova oti mai na sala o via muria mai iNiusiladi.
• Kevaka e solia na vale na nomu itaukei ni cakacaka, mo kerea na kena itaba ka raica na website ni veiqaravi ni tabana ni vale saumi mo qai vakatauvatana kina na isau ni vale saumi e na vale era tautauvata e na vanua vata koya kei na nomu dodonu vaka dau ni saumi vale.
• Mo kila na itukutuku kei Niusiladi kei na isau ni bula vaka kina na veiqaravi ni bula. Era tiko na itukutuku yaga ena neitou itukutuku kei na website.
• Mo vulica na nomu dodonu vaka e dua na tamata cakacaka e Niusiladi. Ena veivuke na itukutuku e ra tiko ena website ni Tabana ni Veivakacakacakataki e Niusiladi ena vuqa na mataqali vosa kei na so na vuli e sega ni saumi, na itavi kei na sala me vakasaqarai kina na iwali ni leqa vakacakacaka.
• E so na gauna e ra dau solia na lawaki ca na ivolatara ni curuvanua lasutaki. Kevaka e tukuna e dua na kena ivakalesilesi veivuke ni curuvanua se daunivakasala ni sa soli vei iko na ivolatara ni curuvanua i Niusiladi, sa rawa mo vakadeitaka na kena dina ena nomu vakayagataka na veiqaravi ni Veivakadeitaki ni iVola tara ni curuvanua.
• Vakaraitaka vei ira na vakailesilesi ena nomu vanua me vaka Ovisa me baleta na ilawaki. Kevaka o tiko i Niusiladi e sa rawa mo vakaraitaki na itukutuku ni ilawaki ena website ni lewa nomu vakayagataka na initaneti.